ތުރުކީގެ މައި އިދިކޮޅު ޕާޓީ ކަމަށްވާ ރިޕަބްލިކަން ޕީޕަލްސް ޕާޓީ (ސީއެޗްޕީ) އަށް ނިސްބަތްވާ ފަސް މޭޔަރެއްގެ މައްޗަށް ކޮރަޕްޝަންގެ ކުށް ސާބިތުވެ، ދިގު މުއްދަތުގެ ޖަލު ހުކުމްތަކެއް ތުރުކީގެ ކޯޓަކުން ހޯމަ ދުވަހު އިއްވައިފިއެވެ. ފާޑުކިޔާ ފަރާތްތަކުން މި ޝަރީއަތް ސިފަކޮށްފައިވަނީ ސިޔާސީ މަގުސަދެއްގައި ހިންގި ބޭއިންސާފު ކަމެއްގެ ގޮތުގައެވެ.
އިސްތަންބޫލްގެ ސިލިވްރީ ޖަލު ކައިރީގައި ހުންނަ ކޯޓުގައި ހަތް މަސްދުވަހަށް ކުރިއަށްދިޔަ މި ޝަރީއަތުގައި ރިޝްވަތު ހިފުމާއި، ޓެންޑަރުތައް އޮޅުވާލުމާއި، މަނީ ލޯންޑަރިންގގެ ތުހުމަތުތައް ވަނީ ކޮށްފައެވެ.
ހުކުމް އިއްވި ފަސް މޭޔަރުންގެ ތެރެއިން އެންމެ ބޮޑު ހުކުމެއް އައީ އިސްތަންބޫލްގެ ބެޝިކްތާޝް (Besiktas) ޑިސްޓްރިކްޓްގެ މޭޔަރު ރިޒާ އަކްޕޮލާތު އަށެވެ. އޭނާގެ މައްޗަށް ވަނީ 23 އަހަރާއި ތިން މަސްދުވަހުގެ ޖަލު ހުކުމެއް އިއްވާފައެވެ. ދެން ތިބި ހަތަރު މޭޔަރުންނަށް އިއްވާފައިވަނީ ފަސް އަހަރާއި އަށް އަހަރާ ދެމެދުގެ ޖަލު ހުކުމްތަކެކެވެ. މީގެ ކުރިން މި އެންމެން ވެސް ވަނީ ހައްޔަރުކުރުމާއެކު މަގާމުން ވަކިކޮށްފައެވެ.
މި މައްސަލަ ބިނާކޮށްފައިވަނީ ވިޔަފާރިވެރިޔާ އަޒީޒް އިހްސާން އަކްތާޝް ކިޔާ މީހަކު، މުނިސިޕަލްޓީތަކުގެ ކޮންޓްރެކްޓްތައް ހޯދުމަށް ރިޝްވަތު ދިން ކަމަށް ބުނެ އޭނާ ދިން އިއުތިރާފު ބަޔާންތަކާއި ސިއްރު ހެކިންގެ ހެކިބަހުގެ މައްޗަށެވެ. ނަމަވެސް މޭޔަރުން ވަނީ އަކްތާޝް ދަންނަ ކަމަށް ވެސް އިންކާރުކޮށް، މިއީ ސަރުކާރުން ބިނާކުރި ދޮގު ތުހުމަތުތަކެއް ކަމަށް ބުނެފައެވެ.
ބެޝިކްތާޝްގެ މޭޔަރު އަކްޕޮލާތު ކޯޓުގައި ވިދާޅުވީ، ސީއެޗްޕީގެ އެތެރޭގެ އިންތިޚާބާ ދެކޮޅަށް ހެކިބަސް ދީފިނަމަ ދައުވާތައް އަނބުރާ ގެންދާނެ ކަމަށް ތަހުގީގު ޓީމުން ބުނެ އޭނާއަށް ޑީލް ހުށަހެޅި ކަމަށެވެ.
ތުރުކީ ސަރުކާރުން ޝަރުއީ ދާއިރާއަކީ މިނިވަން ދާއިރާއެއް ކަމަށް ބުނި ނަމަވެސް، 2019 އާއި 2024 ގެ މުނިސިޕަލް އިންތިޚާބުތަކުގައި އިދިކޮޅު ފަރާތްތަކުން ބޮޑެތި ކާމިޔާބީތަކެއް ހޯދި ފަހުން، އިދިކޮޅު ޕާޓީތަކުގެ އިސް ވެރިންނާ ދެކޮޅަށް ސިލްސިލާ ގޮތެއްގައި ކޯޓު މައްސަލަތައް އުފައްދައި ހައްޔަރުކުރަމުންދާ ކަމަށް ހައްގުތަކަށް މަސައްކަތްކުރާ ޖަމާއަތްތަކުން ފާހަގަކުރެއެވެ.
