ތުރުކީގެ ކޯޓަކުން ނެރުނު އަމުރަކާ ގުޅިގެން މައި އިދިކޮޅު ޕާޓީ ކަމަށްވާ ރިޕަބްލިކަން ޕީޕަލްސް ޕާޓީ (ސީއެޗްޕީ) ގެ ލީޑަރޝިޕް ބަދަލުކުރުމާ ގުޅިގެން އުފެދުނު ސިޔާސީ ހަލަބޮލިކަމުގެ ތެރޭގައި، ޖަލުގައި ހުންނެވި އިސްތަންބޫލްގެ މޭޔަރު އެކްރެމް އިމާމްއޮގްލޫ އަލަށް އުފެއްދި އިދިކޮޅު "ނިއު ޕާޓީ" އާ ގުޅިވަޑައިގެންފިއެވެ.
މިދިޔަ މަހު ސީއެޗްޕީގެ ޗެއާމަންކަމުން އޮޒްގޫރު އޮޒެލް ދުރުކޮށް، ކުރީގެ ލީޑަރު ކެމާލް ކިލިޗްދަރޮގްލޫ މަގާމަށް އިއާދަކުރުމަށް ކޯޓުން ހުކުމްކުރުމާ ގުޅިގެން، އޮޒެލް އާއި 90 މަޖިލިސް މެންބަރުން ވަނީ ޕާޓީން ވަކިވެ ރައީސް ރަޖަބް ތައްޔިބު އުރުދުޣާނާ ދެކޮޅަށް މަސައްކަތްކުރުމަށް އައު ސިޔާސީ ޕާޓީއެއް އުފައްދާފައެވެ.
އެކްސް (ކުރީގެ ޓްވިޓަރ) ގައި އާންމުކުރި ބަޔާނެއްގައި އިމާމްއޮގްލޫ ވިދާޅުވީ، 17 އަހަރު ދުވަހު ސީއެޗްޕީގެ މެންބަރެއްގެ ގޮތުގައި ހުރުމަށްފަހު އެ ޕާޓީން އިސްތިއުފާ ދެއްވި ކަމަށެވެ. އަދި ގައުމުގެ މުސްތަގުބަލަށާއި ރައްޔިތުންނަށްޓަކައި އުފެއްދި "ނިއު ޕާޓީ" އާއެކު ތުރުކީގެ ޑިމޮކްރަސީއަށް އައު އުންމީދީ ދޮރެއް ހުޅުވިގެންދާނެ ކަމަށް އޭނާ ވިދާޅުވިއެވެ.
ރައީސް އުރުދުޣާންގެ އެންމެ ބޮޑު ސިޔާސީ ވާދަވެރިޔާ ކަމަށް ބެލެވޭ އިމާމްއޮގްލޫ ކޮރަޕްޝަންގެ ތުހުމަތުގައި ހައްޔަރުކޮށް ޝަރީއަތް ނިމެންދެން ޖަލުގައި ބަހައްޓާފައި ހުންނަތާ މިހާރު ވަނީ އަހަރަކަށްވުރެ ގިނަ ދުވަސް ވެފައެވެ. އޭނާ ވަނީ މި ތުހުމަތުތަކަށް އިންކާރު ކުރައްވާފައެވެ. މީގެއިތުރުން، އޭނާގެ ރިޔާސީ ކެންޑިޑެސީއަށް ހުރަސްއެޅުމުގެ ގޮތުން ޔުނިވަރސިޓީ ޑިގްރީ ވެސް ވަނީ ބާތިލުކޮށްފައެވެ.
މިހާރު ތުރުކީގެ ޕާލަމެންޓުގެ ދެވަނައަށް އެންމެ ބޮޑު ޕާޓީއަށް ވެފައިވާ މި އައު ޕާޓީއަކީ އުރުދުޣާނާ ދެކޮޅަށް ވަރުގަދަ ބާރަކަށް ވާނެ ކަމަށް ބެލެވުނު ނަމަވެސް، އިދިކޮޅު ފަރާތްތައް ބައިބައިވުމުގެ ފައިދާ ނަގައިގެން ވޭތުވެދިޔަ 23 އަހަރު ވެރިކަން ކުރައްވާފައިވާ އުރުދުޣާންގެ ބާރު އިތުރަށް ގަދަވުމުގެ ފުރުސަތު ބޮޑު ކަމަށް މަސްރަހު ދިރާސާކުރާ ފަރާތްތަކުން ބުނެއެވެ.
