ވޮޝިންގޓަނުން އަޅާފައިވާ ހުރަސްތަކަށް ރައްދު ދިނުމުގެ ގޮތުން، އެމެރިކާއަށް ޑްރޯން އެކްސްޕޯޓްކުރުން ކޮންޓްރޯލްކުރުމާއި އެމެރިކާގެ ހަ ކުންފުންޏަކާއި ޖަމާއަތަކާއެކު ވިޔަފާރީގެ އެންމެހައި މުއާމަލާތްތައް ކުރުން މަނާކުރުން ހިމެނޭ ގޮތަށް އިގްތިސާދީ ގިނަ ފިޔަވަޅުތަކެއް ޗައިނާއިން ބުދަ ދުވަހު އިއުލާނުކޮށްފިއެވެ.
މިދިޔަ މެއި މަހު ބެއިޖިންގގައި އެމެރިކާގެ ރައީސް ޑޮނަލްޑް ޓްރަމްޕާއެކު ބޭއްވި ބައްދަލުވުންތަކުގައި ގުޅުން ރަނގަޅުވާ ކަމުގެ ނިޝާންތަކެއް ފެނުނު ނަމަވެސް، އަންނަ ސެޕްޓެމްބަރު މަހު ޗައިނާގެ ރައީސް ޝީ ޖިންޕިންގ އެމެރިކާއަށް ކުރައްވަން ރާވާފައިވާ ޒިޔާރަތުގެ ކުރިން ދުނިޔޭގެ އެންމެ ބޮޑު ދެ އިގްތިސާދުގެ މެދުގައި ނުތަނަވަސްކަން މިވަނީ އަނެއްކާވެސް ބޮޑުވެފައެވެ.
ޗައިނާގެ ކޮމާސް މިނިސްޓްރީން ބުނީ، މިއީ އެމެރިކާގެ ފެޑެރަލް ކޮމިއުނިކޭޝަންސް ކޮމިޝަން (އެފްސީސީ) އިން ޗައިނާގެ ޑްރޯންތައް އެތެރެކުރުން މަނާކުރުމާއި، އެމެރިކާގެ ޑިޕާޓްމަންޓް އޮފް ހޯމްލޭންޑް ސެކިއުރިޓީން މަޖުބޫރުން މަސައްކަތްކުރުވާ ކަމުގެ ބަހަނާގައި ޗައިނާގެ 43 ކުންފުންޏެއް ކަޅު ލިސްޓަށް ލުމާ ގުޅިގެން އެޅި ރައްދު ފިޔަވަޅުތަކެއް ކަމަށެވެ.
"އެމެރިކާގެ މި ފިޔަވަޅުތަކަކީ ދެ ގައުމުގެ ވެރިން އެއްބަސްވެފައިވާ ކަންކަމާ ކަނޑައެޅިގެން ޚިލާފު، އަދި ޗައިނާގެ ގާނޫނީ ހައްގުތަކަށް ގެއްލުންދޭ ކަމެއް. ޗައިނާއަށް މަޖުބޫރުވީ ރައްދު ފިޔަވަޅު އަޅަން،" މިނިސްޓްރީން ބުންޏެވެ.
ޗައިނާއިން އަޅާފައިވާ ފިޔަވަޅުތަކުގެ ތެރޭގައި:
މަދަނީ އަދި އަސްކަރީ ބޭނުންތަކަށް ބޭނުންކުރެވިދާނެ ޑްރޯންތަކާއި، އޭގެ މުހިންމު ބައިތަކާއި ގުޅުންހުރި ޓެކްނޮލޮޖީ އެމެރިކާއަށް އެކްސްޕޯޓްކުރެވޭނީ ވަކިވަކިން ހުއްދަ ނަގައިގެން ކަމަށް ހަމަޖެއްސުން.
އެޕްލައިޑް ޑީއެންއޭ ސައިންސަސް (Applied DNA Sciences) އަދި ނިއުޔޯކުގައި ހިންގާ ހިއުމަން ރައިޓްސް އިން ޗައިނާ ޖަމިއްޔާ ހިމެނޭހެން އެމެރިކާގެ 6 ފަރާތަކާއެކު ޗައިނާގެ ކުންފުނިތަކުން ވިޔަފާރިކުރުން މަނާކުރުން.
އެމެރިކާގެ އެފްސީސީއާ ގުޅިގެން ޗައިނާގެ ސަލާމަތަށް ގެއްލުންދިން ކަމަށް ބުނެ ކޮމްޕްލަޔަންސް ޓެސްޓިންގ (Compliance Testing LLC) ކުންފުންޏަށް ޗައިނާގައި ވިޔަފާރިކުރުން މަނާކުރުން.
އިލެކްޓްރޯނިކް ސާމާނުގެ ސޭފްޓީ މިންގަނޑު ކަމަށްވާ ސީސީސީ (CCC) ސެޓްފިކެޓް ދިނުމުގައި ހަރަކާތްތެރިވާ އެމެރިކާގެ ކުންފުނިތަކުގެ ހުއްދަ ބާތިލުކުރުން.
އެމެރިކާއިން މީގެ ކުރިން ވަނީ ޗައިނާގެ އިންސާނުންގެ ސިފައިގައި ހުންނަ ރޮބޮޓްތަކާއި (ހިއުމަނޮއިޑް ރޮބޮޓްސް) އަދި ޕަވަރ އިންވާޓަރުތައް ވެސް ގައުމީ ސަލާމަތުގެ ސަބަބުތަކަށްޓަކައި އެތެރެކުރުން މަނާކޮށްފައެވެ. ޗައިނާއިން އިންޒާރު ދީފައިވަނީ އެމެރިކާއިން އިތުރު ފިޔަވަޅުތައް އަޅާނަމަ ޗައިނާއިން ވެސް ރައްދުގައި އިތުރު ފިޔަވަޅުތައް އަޅާނެ ކަމަށެވެ.
