މީގެ ހަތަރު މަސް ކުރިން އަފްޣާނިސްތާނުގެ ވެރިރަށް ކާބުލްއަށް ޕާކިސްތާނުން ދިން ވައިގެ ހަމަލާތަކަކީ "ހަނގުރާމައިގެ ޖަރީމާއަކަށް ވެދާނެ" ފަދަ އަމަލެއްގެ ގޮތުގައި ސިފަކޮށް، އެ ހަމަލާތައް މިނިވަންކަމާއެކު ތަހުގީގުކުރުމަށް އެމްނެސްޓީ އިންޓަނޭޝަނަލުން ބުދަ ދުވަހު ގޮވާލައިފިއެވެ.
16 މާޗުގައި ދިން މި ހަމަލާތަކުގައި މަދުވެގެން 269 އާންމުން މަރުވެ، އިތުރު 122 މީހުން ޒަޚަމްވި ކަމަށް އދ. އިން އަފްޣާނިސްތާނަށް ކަނޑައަޅާފައިވާ މިޝަން (ޔުނާމާ - UNAMA) އިން ކުރިން ބުނެފައިވެއެވެ. ޔުނާމާއާއި އަފްޣާނިސްތާނުގެ ތާލިބާން ސަރުކާރުން ތުހުމަތުކުރި ގޮތުގައި ޕާކިސްތާނުގެ ހަމަލާ އަމާޒުވީ މަސްތުވާތަކެއްޗަށް ފަރުވާދޭ މަރުކަޒަކަށެވެ. ނަމަވެސް އެ ރޭ ޕާކިސްތާނުން ބުނީ ހަމަލާ ދިނީ "އަސްކަރީ އަދި ޓެރަރިސްޓް އިންފްރާސްޓްރަކްޗާ" އަށް ކަމަށެވެ.
ލަންޑަނަށް ނިސްބަތްވާ އެމްނެސްޓީ އިންޓަނޭޝަނަލުން ބުދަ ދުވަހު ބުނީ، އިސްލާމްއާބާދުގެ އެ ދައުވާއަށް ބާރުދޭ އެއްވެސް ހެއްކެއް ފެންނަން ނެތް ކަމަށެވެ.
"މި ވައިގެ ހަމަލާތަކަކީ ބައިނަލްއަގުވާމީ އިންސާނީ ގާނޫނުތަކުގެ ދަށުން ސިއްހީ ޚިދުމަތްދޭ ތަންތަނަށް ލިބިދޭ ޚާއްސަ ރައްކާތެރިކަމާ ޚިލާފު، އަދި އާންމުން ހިމާޔަތްކުރުމަށް ކަނޑައަޅާފައިވާ މައިގަނޑު އުސޫލުތަކާ ކަނޑައެޅިގެން ޚިލާފު އަމަލުތަކެއް،" އެމްނެސްޓީން ބުންޏެވެ.
އިންސާނީ ހައްގުތަކަށް ވަކާލާތުކުރާ މި ޖަމާއަތުން ބުނީ އެމީހުންގެ ނިންމުން ބިނާކޮށްފައިވަނީ ހާދިސާ ހިނގި ތަނުގެ 60 އަށް ވުރެ ގިނަ ފޮޓޯއާއި ވީޑިއޯ ދިރާސާކުރުމަށާއި، ސެޓެލައިޓް ފޮޓޯތަކަށާއި، މަސްތުވާތަކެއްޗަށް ފަރުވާދޭ އެ މަރުކަޒުގެ މިހާރުގެ އަދި ކުރީގެ މުވައްޒަފުންނާ ކުރެވުނު އިންޓަވިއުތަކުގެ މައްޗަށް ކަމަށެވެ.
މި މައްސަލައާ ގުޅިގެން ޕާކިސްތާނުގެ ޚާރިޖީ ވުޒާރާއިން ވަގުތުން އެއްވެސް އެއްޗެއް ބުނެފައެއް ނުވެއެވެ.
ހަމަލާ ދިންތާ އަނެއް ދުވަހު، 17 މާޗުގައި ޕާކިސްތާނުގެ އިންފޮމޭޝަން މިނިސްޓަރު އަހްސަނުﷲ ތަރާރު ވަނީ ތާލިބާނުންގެ ތުހުމަތުތައް ދޮގުކުރައްވާފައެވެ. "އެއްވެސް ހޮސްޕިޓަލަކަށް، މަސްތުވާތަކެއްޗަށް ފަރުވާދޭ މަރުކަޒަކަށް، އަދި އާންމު ރައްޔިތުންގެ އެއްވެސް ތަނަކަށް ހަމަލާއެއް އަމާޒެއް ނުކުރަން،" ތަރާރު ވިދާޅުވެފައިވެއެވެ.
މާޗް މަހު މި ހަމަލާތައް ދީފައިވަނީ ޕާކިސްތާނާއި އަފްޣާނިސްތާނުގެ ތާލިބާން ސަރުކާރާ ދެމެދު ކުރިމަތިލުންތައް އިތުރުވެފައިވާ ދަނޑިވަޅެއްގައެވެ. ފާއިތުވި މަސްތަކުގައި ވެސް ދެ ގައުމުގެ ބޯޑަރު ސަރަހައްދުގައި ދަނީ ހަމަލާތައް ބަދަލުކުރެވެމުންނެވެ.
އިސްލާމްއާބާދުން މި ހަމަލާތައް ދިފާއުކޮށް ބުނަމުންދަނީ، މިއީ ޕާކިސްތާނުގެ އެތެރޭގައި ހަނގުރާމަވެރިން ދޭ ހަމަލާތައް އިތުރުވަމުންދާތީ އެކަމަށް ރައްދު ދިނުމުގެ ގޮތުން ދިން ހަމަލާތަކެއް ކަމަށެވެ. އަދި މި ހަމަލާތަކުގެ ޒިންމާ ޕާކިސްތާނުން އަޅުވަނީ އަފްޣާން ސަރުކާރުގެ ބޮލުގައެވެ. ނަމަވެސް ތާލިބާން ސަރުކާރުން ބުނަނީ ޕާކިސްތާނުގެ ހަނގުރާމަވެރިންނަށް އެމީހުން އެއްވެސް އެހީތެރިކަމެއް ނުދޭ ކަމަށެވެ.
