2022 ވަނަ އަހަރުގެ ހަތަރުވަނަ ކުއާޓަރަށްފަހު ޗައިނާގެ އިގްތިސާދު އެންމެ ބޮޑަށް ދަށަށް ދިޔަ ދުވަސްވަރަކަށް މިއަހަރުގެ ދެވަނަ ކުއާޓަރު ވެގެން ގޮސްފިއެވެ. އިންވެސްޓްމަންޓްތައް ހަލުވިކަމާއެކު ދަށަށް ދިއުމާއި، އާންމުން މުދާ ގަތުމުގެ ޝައުގުވެރިކަން ދަށްވެފައި އޮތުމުގެ ސަބަބުން އިގްތިސާދު ހަމައަކަށް އެޅުވުމަށް ސަރުކާރުން އެހީތެރިކަން (ސްޓިމިއުލަސް) ދިނުމަށް ގޮވާލާ އަޑުތައް ވަނީ ގަދަވެފައެވެ.
ނޭޝަނަލް ސްޓެޓިސްޓިކްސް ބިއުރޯއިން ބުދަ ދުވަހު އާންމުކުރި ތަފާސްހިސާބުތައް ދައްކާ ގޮތުގައި، އޭޕްރީލް އިން ޖޫން މަހުގެ ނިޔަލަށް ޗައިނާގެ ޖީޑީޕީ (GDP) ކުރިއަރާފައިވަނީ 4.3 އިންސައްތައިންނެވެ. މިއީ ރޮއިޓާސްގެ ސާވޭއަކުން އިގްތިސާދީ މާހިރުން ލަފާކުރި 4.5 އިންސައްތައަށްވުރެ ދަށް އަދަދެކެވެ. އަދި ފުރަތަމަ ކުއާޓަރުގައި ރެކޯޑުކުރި 5 އިންސައްތައިގެ ކުރިއެރުމާ އަޅާބަލާއިރު ބޮޑު ދަށްވުމެކެވެ.
މި ކުރިއެރުމަކީ ވޭތުވެދިޔަ އެތައް އަހަރެއްގެ ތެރޭގައި ބެއިޖިންގއިން ކަނޑައެޅި އެންމެ ދަށް އަހަރީ އަމާޒު ކަމަށްވާ 4.5 އިންސައްތައާއި 5 އިންސައްތައާ ދެމެދުގެ މިންވަރަށްވުރެ ވެސް ދަށް އަދަދެކެވެ. މިއީ އެމެރިކާއާއި ޔޫރަޕިއަން ޔޫނިއަން ފަދަ ބައިނަލްއަގުވާމީ ވިޔަފާރީގެ ބައިވެރިންނާއެކު އޮތް ނުތަނަވަސްކަމާއި، އެތެރޭގެ ބާޒާރުގައި ޑިމާންޑް ދަށްވުމުގެ ސަބަބުން ދިމާވި ކަމެކެވެ.
އިކޮނޮމިސްޓް އިންޓެލިޖެންސް ޔުނިޓުގެ ސީނިއަރ އިކޮނޮމިސްޓް ތިއަންޗެން ޒޫ ވިދާޅުވީ، އިގްތިސާދީ ކުރިއެރުން ދަށްވުމާ ގުޅިގެން، ތިންވަނަ ކުއާޓަރުގައި އިންވެސްޓްމަންޓް ޑިމާންޑް އިތުރުކުރުމަށްޓަކައި އިންޓްރެސްޓް ރޭޓް ކުޑަކުރުން ފަދަ ފިޔަވަޅުތައް އަޅާނެ ކަމަށް ބެލެވޭ ކަމަށެވެ.
ފުރަތަމަ ހަ މަސްދުވަހުގެ ތެރޭގައި ސިޓީތަކުގެ ފިކްސްޑް-އެސެޓް އިންވެސްޓްމަންޓް (ރިއަލް އެސްޓޭޓާއި އިންފްރާސްޓްރަކްޗާ ހިމެނޭހެން) ވަނީ 5.7 އިންސައްތަ ދަށަށް ގޮސްފައެވެ. މިއީ މާކެޓުން ލަފާކުރި 4.9 އިންސައްތައިގެ ދަށްވުމަށްވުރެ ގޯސް ހާލަތެކެވެ.
ރަސްމީ ހިސާބުތަކުން ދައްކާ ގޮތުގައި:
ރިއަލް އެސްޓޭޓް އިންވެސްޓްމަންޓް: 18 އިންސައްތަ ދަށަށް.
އިންފްރާސްޓްރަކްޗާ އިންވެސްޓްމަންޓް: 2.4 އިންސައްތަ ދަށަށް.
މެނުފެކްޗަރިންގ އިންވެސްޓްމަންޓް: 1.2 އިންސައްތަ ދަށަށް.
ނަމަވެސް، ޖޫން މަހު ރީޓެއިލް ސޭލްސް ވަނީ 1 އިންސައްތައިގެ ކުރިއެރުމެއް ހޯދައި، މެއި މަހު އޮތް 0.6 އިންސައްތައިގެ ދަށްވުމުން އަރައިގަނެފައެވެ. އަދި ސިނާއީ އުފެއްދުންތެރިކަން (އިންޑަސްޓްރިއަލް އައުޓްޕުޓް) ވަނީ 5.3 އިންސައްތަ ކުރިއަރައި، ލަފާކުރި 4.7 އިންސައްތައަށްވުރެ ރަނގަޅު ނަތީޖާއެއް ހޯދާފައެވެ. މިއީ ދުނިޔޭގެ އޭއައި (AI) އިންވެސްޓްމަންޓްތަކާ ގުޅިގެން ޗައިނާގެ ހައި-ޓެކް އެކްސްޕޯޓްތަކަށް ލިބުނު ބާރެކެވެ.
ތަފާސްހިސާބާ ބެހޭ އިދާރާއިން ފާހަގަކުރި ގޮތުގައި، އުފެއްދުންތެރިކަން ގިނަވެ ޑިމާންޑް ދަށްވުމުގެ ނުތަނަވަސްކަން އިންތިހާއަށް ބޮޑުވެފައިވާއިރު، އިގްތިސާދީ ދުވެލި އެއްވަރެއްގައި ހިފެހެއްޓުމަށް އިތުރު ފިޔަވަޅުތަކެއް އަޅަންޖެހެއެވެ.
ޗިންގހުއާ ޔުނިވާސިޓީގެ ޕްރޮފެސަރ އަދި ޗައިނާގެ މަރުކަޒީ ބޭންކުގެ ކުރީގެ މުޝީރު ލީ ދާއޮކުއީ ވިދާޅުވީ، އިންވެސްޓްމަންޓްތައް ދަށަށް ދާ މިންވަރަކީ މީގެ ކުރިން ދުވަހަކުވެސް ނުދެކޭ ފަދަ ބޮޑު ދަށްވުމެއް ކަމަށެވެ. އަދި އިގްތިސާދު ނެގެހެއްޓުމަށްޓަކައި ސަރުކާރުން އިތުރަށް ދަރަނި ނަގައިގެން ޚަރަދުކުރުން ދެގުނައަށް އިތުރުކުރަންޖެހޭ ކަމަށް އޭނާ ގޮވާލެއްވިއެވެ.
